អាមេរិក៖ ក្លិបបាល់ទាត់ Inter Miami របស់តារាបាល់ទាត់ឆ្នើមសញ្ជាតិអង់គ្លេស David Beckham ត្រូវរងការពិន័យជាទឹកប្រាក់រហូតដល់ ២លានដុល្លារអាមេរិក ក្រោយត្រូវបានស៊ើបអង្កេតឃើញថាបានបំពានច្បាប់របស់លីគកំពូលអាមេរិក (Major League Soccer)។

ការស៊ើបអង្កេតនេះត្រូវបានធ្វើឡើងតាំងពីឆ្នាំមុន អំឡុងពេលដែលក្លិប Inter Miami បានចុះកុងត្រានាំយកកីឡាករ Blaise Matuidi ពីក្លិប Juventus នៅក្នុងខែសីហា ឆ្នាំ ២០២០។ ក្របខណ្ឌ Major League Soccer បានប្រកាសដាក់ទណ្ឌកម្មក្លិប Inter Miami កាលពីថ្ងៃសុក្រកន្លងទៅ ដែលពាក់ព័ន្ធទៅនឹងបំពានលក្ខខណ្ឌ "Designated players" របស់លីគកំពូលអាមេរិកនេះ។ 

Designated players គឺជាគោលការណ៍មួយ ដែលកំណត់ឱ្យក្លិបនីមួយអាចនាំយកកីឡាករចំនួន ៣នាក់ដោយប្រើប្រាស់ខ្ទង់ចំណាយផ្សេង មិនពាក់ព័ន្ធនឹងការកំណត់ប្រចាំឆ្នាំរបស់ក្លិប ដែលអនុញ្ញាតដោយ MLS។ ក្រោយពីការស៊ើបអង្កេតបានបញ្ចប់ MLS បានរកឃើញថា កីឡាករ Matuidi គឺជាសមាជិកទី ៤ ដែលស្ថិតក្នុងក្របខណ្ឌ Designated players របស់ Inter Miami ដែលល្មើសទៅនឹងគោលការណ៍នេះ។

គួរបញ្ជាក់ថា ប្រាក់ពិន័យ ២លានដុល្លារនេះ គឺជាកំណត់ត្រាខ្ពស់បំផុតដែលមិនធ្លាប់មានពីការពិន័យក្លិបបាល់ទាត់នៅក្នុងក្របខណ្ឌលីគកំពូល Major League Soccer។ ក្លិបបាល់ទាត់ Inter Miami បច្ចុប្បន្ននេះដឹកនាំដោយអ្នកចាត់ការសញ្ជាតិអង់គ្លេស និងជាអតីតមិត្តរួមក្រុមរបស់ Beckham ផ្ទាល់គឺ Phil Neville៕